“He that is usant to this sinne of glotonie, he ne may no sinne withstond, he must be in servage of all vices, for it is the devils horde, ther he hideth him and resteth. This sinne hath many spices. The first is dronkennesse, that is the horrible sepulture of mannes reson: and therefore whan a man is dronke, he hath lost his reson: and this is dedly sinne. But sothly, whan that a man is not wont to strong drinkes, and peraventure nc knoweth not the strength of the drinke, or hath feblenesse in his hed, or hath travailled, thurgh which he drinketh the more, al be he sodenly caught with drinke, it is no dedly sinne, but venial. The second spice of glotonie is, that the spirit of a man wexeth all trouble for dronkennesse, and bereveth a man the discretion of his wit. The thridde spice of glotonie is, whan a man devoureth his mete, and hath not rightful maner of eting. The fourthe is, whan thurgh the gret abundance of his mete, the humours in his body ben distempered. The fifthe is, foryetfulnesse by to moche drinking, for which sometime a man forgeteth by the morwe, what he did over eve.”

↩