“Of the erl Hugelin of Pise the langour Ther may no tonge tellen for pitee. But litel out of Pise stant a tour, In whiche tour in prison yput was he, And with him ben his litel children three, The eldest scarsely five yere was of age: Alas! fortune, it was gret crueltee Swiche briddes for to put in swiche a cage.

Dampned was he to die in that prison, For Roger, which that bishop of Pise, Had on him made a false suggestion, Thurgh which the pcplc gan upon him rise, And put him in prison, in swiche a wise, As ye han herd; and mete and drinke he had So smale, that wel unnethe it may suffise, And therwithal it was ful poure and bad.