Corol. I.
*Corpus viribus conjunctis diagonalem parallelogrammi eodem tempore describere, quo latera separatis.*
Si corpus dato tempore, vi sola M, ferretur ab A ad B, & vi sola N, ab A ad C, compleatur parallelogrammum ABDC, & vi utraq; feretur id eodem tempore ab A ad D. Nam quoniam vis N agit secundum lineam AC ipsi BD parallelam, hæc vis nihil mutabit velocitatem accedendi ad lineam illam BD a vi altera genitam. Accedet igitur corpus eodem tempore ad lineam BD sive vis N imprimatur, sive non, atq; adeo in fine illius temporis reperietur alicubi in linea Page 14 illa BD. Eodem argumento in fine temporis ejusdem reperietur alicubi in linea CD, & idcirco in utriusq; lineæ concursu D reperiri necesse est.
Corol. II.
*Et hinc patet compositio vis directæ*AD*ex viribus quibusvis obliquis*AB*&*BD*, & vicissim resolutio vis cujusvis directæ*AD*in obliquas quascunq;*AB*&*BD*. Quæ quidem Compositio & resolutio abunde confirmatur ex Mechanica.*