Prop. XXVI. Prob. VI.
*Invenire incrementum areæ quam Luna radio ad Terram ducto describit.*
Diximus aream, quam Luna radio ad Terram ducto describit, esse tempori proportionalem, nisi quatenus motus Lunaris ab actione Solis turbatur. Inæqualitatem momenti (vel incrementi horarii) hic investigandam proponimus. Ut computatio facilior reddatur, fingamus orbem Lunæ circularem esse, & inæqualitates omnes negligamus, ea sola excepta, de qua hic agitur. Ob ingentem verò Solis distantiam ponamus etiam lineas QP , QS sibi invicem parallelas esse. Hoc pacto vis LM reducetur semper ad mediocrem Page 436 suam quantitatem SP , ut & vis SM ad mediocrem suam quantitatem 3 PK . Hæ vires, per Legum Corol. 2. componunt vim SL ; & hæc vis, si in radium SP demittatur perpendiculum LE , resolvitur in vires SE , EL , quarum SE , agendo semper secundum radium SP , nec accelerat nec retardat descriptionem areæ QSP radio illo SP factam; & EL agendo secundum perpendiculum, accelerat vel retardat ipsam, quantum accelerat vel